विराटनगर । नेकपा एमालेका अध्यक्ष केपी शर्मा ओलीले निर्वाचनको स्वच्छता र निष्पक्षतामाथि प्रश्न उठाउँदै धाँधलीरहित निर्वाचनका लागि सरकारलाई गम्भीर बन्न आग्रह गरेका छन्।
विद्यार्थीहरूसँग दमकमा शुक्रवार बिहान भएको अन्तरक्रिया कार्यक्रममा ओलीले निर्वाचन प्रचार प्रसारका क्रममा कसैलाई पनि अवमूल्यन गर्ने वा लोकतान्त्रिक मूल्य मान्यता विपरीतका क्रियाकलाप स्वीकार नहुने बताए। उनले त्यस्ता गतिविधि तत्काल रोकिनुपर्ने समेत बताए।
अध्यक्ष ओलीले आफूहरू निर्वाचनको प्रक्रियामा पूर्ण सहभागी हुने र लोकतान्त्रिक अभ्यासलाई स्वीकार गर्ने भए तापनि निर्वाचनमा हुने कुनै पनि प्रकारको धाँधली र अनियमिततालाई कदापि स्वीकार नगर्ने स्पष्ट पारे ।
ओलीले भने, निर्वाचन निष्पक्ष नभएको खण्डमा र राज्य संयन्त्रको दुरुपयोग गरी नतिजा प्रभावित पार्न खोजिएमा लोकतान्त्रिक शक्तिहरूले त्यसको परिणामलाई मान्यता दिँदैन।
सरकारलाई सुझाव दिँदै ओलीले जनमतको कदर गर्न र धाँधलीमुक्त वातावरणमा निर्वाचन सम्पन्न गर्ने सुनिश्चितता प्रदान गर्न आग्रह गरे।
कतिपय पक्षहरू अझै पनि निर्वाचन नगराउने खेलमा लागिरहेको उल्लेख गर्दै ओलीले समस्याको समाधान सधैँ संवैधानिक र लोकतान्त्रिक बाटोबाटै खोजिनुपर्नेमा जोड दिए।
असंवैधानिक ढङ्गले प्रतिनिधि सभा विघटन गरिएको र त्यसपछि विकसित भएका घटनाक्रमप्रति असन्तुष्टि जनाउँदै अध्यक्ष ओलीले मिचिएका संवैधानिक प्रक्रियाहरूलाई सही बिन्दुबाटै सुधार्नुपर्ने आवश्यकता औँल्याए।
संसद् विद्यमान हुँदाहुँदै अलोकतान्त्रिक बाटोबाट हिँड्न खोज्ने शक्तिहरूले आफ्ना स्वार्थ सिद्धिका लागि निर्वाचनको अस्त्र प्रयोग गर्न खोजेको पनि आरोप छ।
संसद्को उपस्थितिका लागि भन्दा पनि अर्कै प्रकारको राजनीतिक उद्देश्य प्राप्तिका लागि निर्वाचनको विषयहरू अघि सारिएको तरपनि आफूहरू जस्तोसुकै चुनौतीको सामना गर्न तयार रहेको उनले स्पष्ट पारे।
प्रतिनिधि सभाको पुनर्स्थापना र निर्वाचनका विषयमा आफ्ना सर्तहरू यथावत् रहेको बताउँदै ओलीले जुनसुकै परिस्थितिमा पनि निर्वाचनमा सहभागी हुने प्रतिबद्धता व्यक्त गरे।
अध्यक्ष ओलीले निर्वाचनका दौरान राज्य संयन्त्रको भूमिका पूर्णतः निष्पक्ष र तटस्थ हुनुपर्नेमा विशेष जोड दिए।
