सुनसरी – पर्यटन तथा होटल व्यवसायलाई डिजिटल प्रविधिसँग जोडेर थप प्रतिस्पर्धी र प्रभावकारी बनाउने उद्देश्यले इटहरीमा सञ्चालन गरिएको तीनदिने निःशुल्क डिजिटल मार्केटिङ, एआई तथा सामाजिक सञ्जाल व्यवस्थापन सम्बन्धी तालिम सम्पन्न भएको छ।

जिल्ला होटल तथा पर्यटन व्यवसायी संघ सुनसरीको सहयोग तथा नेपाल पर्यटन बोर्डको आयोजनामा असार ११ देखि १३ गतेसम्म तालिम सञ्चालन गरिएको हो।

कार्यक्रम संयोजक तथा संघका वरिष्ठ उपाध्यक्ष केशव गिरीका अनुसार तालिममा सुनसरीसहित कोशी प्रदेशका होटल तथा पर्यटन व्यवसायीहरूको उल्लेखनीय सहभागिता रहेको थियो।

तीन दिनसम्म सञ्चालन भएको तालिममा आईटी प्रशिक्षक विनयराज डंगालले डिजिटल सीप, डिजिटल मार्केटिङ, कृत्रिम बुद्धिमत्ता (एआई), सामाजिक सञ्जाल व्यवस्थापन तथा व्यवसाय प्रवर्द्धनका व्यावहारिक पक्षबारे प्रशिक्षण दिएका थिए।

संघका अध्यक्ष तेजबहादुर पुरीको अध्यक्षतामा सम्पन्न समापन कार्यक्रममा होटल व्यवसाय महासंघका पूर्व केन्द्रीय उपाध्यक्ष देबी गौतम प्रमुख अतिथि रहेका थिए।

कार्यक्रममा इटहरी उपमहानगरपालिकाको पर्यटन शाखा प्रमुख नवल भट्टराईसहित पर्यटन क्षेत्रसँग आबद्ध विभिन्न व्यक्तिहरूको उपस्थिति रहेको थियो।

समापन कार्यक्रममा बोल्दै अध्यक्ष पुरीले समयअनुकूल प्रविधिसँग व्यवसायीलाई जोड्न यस्ता तालिमलाई आगामी दिनमा पनि निरन्तरता दिइने बताए।

आधुनिक प्रविधिको प्रभावकारी प्रयोगमार्फत पर्यटन व्यवसायलाई थप सशक्त र प्रतिस्पर्धी बनाउन यस्ता कार्यक्रमले महत्त्वपूर्ण भूमिका खेल्ने उनको भनाइ थियो।

प्रमुख अतिथि गौतमले तालिमले होटल तथा पर्यटन व्यवसायीलाई डिजिटल प्रविधिको ज्ञान र सीप प्रदान गर्दै व्यवसाय विस्तार तथा पर्यटन प्रवर्द्धनमा टेवा पुग्ने विश्वास व्यक्त गरे। आयोजकका अनुसार तालिममार्फत व्यवसायीलाई डिजिटल प्लेटफर्मको प्रभावकारी प्रयोग, एआईको उपयोग तथा सामाजिक सञ्जालमार्फत पर्यटन प्रवर्द्धनका व्यावहारिक सीप प्रदान गरिएको छ।