सुनसरी । नमुना कलेज र स्मल हेभन स्कुल इटहरीमा जारी हिसान कप क्रिकेट प्रतियोगिताको फाइनलमा पुगेका छन ।
उच्च शिक्षालय तथा माध्यमिक विद्यालय संघ (हिसान) सुनसरीको आयोजनामा भैरहेको प्रतियोगिताको बुधबार सम्पन्न पहिलो सेमिफाइनलमा इटहरीको नमुनाले सुस्मा गोदावरी कलेजलाई ४९ रनले पराजित गर्दै उपाधी नजिक पुगेको हो ।
जनता क्रिकेट मैदानमा टस जितेर पहिले ब्याटिङ गरेको नमुनाले निर्धारित १० ओभरको खेलमा ३ विकेट गुमाउदै १ सय ८ रन बनाएको थियो ।
नमुनाको लागि राजु बिकले अर्धशतकीय इनिङ खेले । उनले २५ बलमा ५८ रन बनाएर अभिजित रहे ।
गुञ्जन दाहालले ११ रन जोडे । जवाफमा १ सय ९ रनको बिजयी लक्ष्य पछ्याएको सुस्मा गोदावरीले ६ बिकेट गुमाउदै ५९ रन मात्र बनाउन सक्यो ।
उसका लागि अनिल बस्नेतले नटआउट २६ रन बनाउदा एमडी आदिलले १६ रन जोडे । नमुनाका राजु बिक प्लेयर अफद म्याच घोषित भए ।
बुधबारनै सम्पन्न दोस्रो सेमिफाइनलमा इनरुवाको स्मल हेभन स्कुलले इटहरीको कोसीसेन्टजेम्सलाई १ सय ४ रनको फराकिलो अन्तरले पराजित गर्दै नमुनासंगको उपाधी भिडन्त पक्का गरेको छ ।
स्मल हेभनले प्रस्तुत गरेको १ सय ६३ रनको बिजयी लक्ष्य पछ्याएको कोसीसेन्टजेम्स १० ओभर खेल्दै सबै बिकेट गुमाएर ५८ रनमा समेटियो ।
कोसी सेन्टजेम्सका मोहीत बिश्वकर्माले २२ रन बनाउनुबाहेक अन्य ब्याटरले दोहोरो अंकमा रन जोड्न सकेनन । यसअघि टस जितेर पहिलो ब्याटिङ गरेको इनरुवाको स्मल हेभनले निर्धारित १५ ओभरको खेलमा ४ विकेट गुमाउदै १ सय ६२ रनको योगफल खडा गरेको थियो ।
उसका लागि रबिन मण्डले ३५ बलमा ७६ रनको उत्कृष्ट पारी खेले । खालिद खानले ३४ रन जोडे ।
रबिन प्लेयरअफद म्याच बने । स्मल हेभन र नमुनाबिचको उपाधी भिडन्त बिहिबार हुनेछ ।
हिसान सुनसरीको १२ औँ स्पोट्र्स मिट अन्तर्गत जारी प्रतियोगितामा सुनसरीका ८ वटा कलेजको सहभागिता रहेको छ ।
