सुनसरी — धरान खेलकुद मञ्चले मंसिर २५ देखि पुस १० सम्म खेलकुद महोत्सव गर्ने भएको छ ।
मञ्चले शनिबार धरानमा पत्रकार सम्मेलन गर्दै महोत्सवबारे जानकारी दिएको हो ।
मञ्चका अध्यक्ष किशोर राईले विभिन्न लोकप्रिय र व्यावसायिक खेल धरानबाटै सुरु भएको जनाउँदै महोत्सवस्थलमा विभिन्न पदकहरु खेल अवधिभर प्रदर्शनीमा राखिने जनाए ।
महोत्सवमा फुटबल, गल्फ, सुटिङ, बास्केटवल, हक्की, डोरी तान, आर्चरीलगायतका विभिन्न खेलको स्टल राखि प्रमोसन गरिने अध्यक्ष राईले बताए ।
उनका अनुसार महोत्सवका अवसरमा पूर्व तथा वर्तमान सर्वश्रेष्ठ खेलाडी र विभिन्न खेलहरुमा राष्ट्रिय, अन्तर्राष्ट्रिय ओलम्पियनसम्म देशको प्रतिनिधित्व गर्ने खेलाडीहरुलाई विशेष सम्मान गर्ने भएको छ ।
अध्यक्ष राईले देशविदेशमा धरान खेलकुदको सहर हो भन्ने सन्देश दिन र धराने जनतामाझ परिचित गराउने उद्देश्यले महोत्सव गर्न लागिएको बताए ।
यसैबीच धरान मेयर स्कुल ओलम्पिक्सले यो वर्षदेखि निरन्तरता पाउने भएको छ ।
मञ्चले आगामी माघ ५ देखि १२ गतेसम्म धरान मेयर कप स्कुल ओलम्पिक फेस्टिभल सञ्चालन गर्ने जानकारी दिएको छ । फेस्टिभलबाट विद्यार्थीहरुको प्रतिभा प्रस्फुटन गर्ने अवसर प्राप्त हुने राईले बताए ।
विभिन्न १२ वटा इभेन्ट समाहित गरिएको स्कुल टु ओलम्पिकमा सितोरियो कराँते, फुटबल, टेबुलटेनिस, तेक्वान्दो, बास्केटबल, ब्याडमिन्टन, भलिबल, क्रिकेट, एथलेटिक्स, उसु, जुडो, सेपाकताक्रो खेल खेलाइने छ ।
यस्तै हरेक वर्षझैं यो वर्ष पनि आगामी साउनमा उत्कृष्ट वर्ष खेलाडी, उत्कृष्ट प्रशिक्षक, उदीयमान खेलाडी, आजीवन खेलाडी मनोनयन गरी विजेतालाई अवार्ड प्रदान गरिने अध्यक्ष राईले बताए ।
