विराटनगरमा पुस्तकालय दिवस तिन दिन मनाइँदै

विराटनगर । विराटनगरमा पहिलो पटक  राष्ट्रिय पुस्तकालय दिवस  भव्य रूपमा मनाउन सुरु भएको छ। विराटनगरमा रहेका ८ वटा पुस्तकालय  सहित विराटनगर महानगरपालिका, सामाजिक विकास मन्त्रालय र विष्णुमाया पुस्तकालयको आयोजनामा  तीन दिने पुस्तकालय दिवस मनाउन सुरु गरिएको हो ।  १५ औँ राष्ट्रिय पुस्तकालय दिवसको अवसरमा त्रि दिवसीय कार्यक्रमको आयोजना गरिएको आयोजक संस्था विष्णुमाया पुस्तकालयका अध्यक्ष केशवप्रसाद गौतमले जानकारी दिए ।  नेपालमा पुस्तकालयको  प्रारम्भ १८६९ सालमा राजा गीर्वाण युद्ध वीर विक्रम शाहको पालामा सुरु भएको मानिन्छ ।   पुस्तकालयलाई सूचना र ज्ञानको केन्द्रको रूपमा विकास गर्ने, पुस्तकालयको महत्वलाई जन साधारणलाई बुझाउने, पठन संस्कृतिको विकास गर्ने, सूचनामा आधारित समाज निर्माण गर्ने, पुस्तकालयको विकासमा सहयोग पुर्‍याउने, सामाजिक सद्भाव र एकता कायम राख्ने, अध्ययन अनुसन्धान र प्रकाशन गर्ने र पुस्तकालयको समस्या र समाधानका उपायहरूको खोजी गर्ने मुख्य उद्देश्य रहेको   गौतमले जानकारी दिए । 

तिन दिने कार्यक्रमको पहिलो दिन बिहीबार  पुस्तकालयहरू सरसफाइ एवम् व्यवस्थापनको प्रचारप्रसार गरेका छन् । भाद्र १५ गते शुक्रवारका दिन सामुदायिक पुस्तकालयको महत्त्व विषयमा वक्तृत्व  प्रतियोगिता तथा कवि गोष्ठी आयोजना गरिएको गौतमले बताए । भाद्र १६ गते शनिवारको दिन पुस्तकालयका चुनौतीहरु  र समाधान विषयक बिचार गोष्ठीको आयोजना गरिएको छ।  

विराटनगरमा रहेको गुराँस पुस्तकालय, आदर्श पुस्तकालय, बुद्ध मिलन पुस्तकालय, गणेश पुस्तकालय, देवकोटा पुस्तकालय, लेखनाथ पुस्तकालय, त्रिवेणी पुस्तकालय र मुनाल मनोरञ्जन तथा गोपीनाथ पुस्तकालय लगायतको सहभागिता थियो । डा चन्द्र उपाध्यायको सञ्चालनमा भएको कार्यक्रममा आदर्श पुस्तकालय र मुनाल मनोरञ्जन तथा गोपीनाथ पुस्तकालयका अध्यक्षहरूले पुस्तकालयका महत्त्व र अहिलेका समस्याको बारेमा धारणा राखेका थिए ।