विराटनगर । माध्यमिक शिक्षा परीक्षा (एसईई) २०८१ मा सर्वोत्तम नतिजा ४ जीपीए ल्याउने विद्यार्थी र विद्यालयलाई विराटनगर महानगरपालिकाले सम्मान गरेको छ ।
विराटनगर महानगरमा आज शुक्रबार आयोजना गरेको कार्यक्रममा महानगर क्षेत्रभित्र सञ्चालित सामुदायिक र संस्थागत विद्यालयबाट ४ जीपीए ल्याउने विद्यार्थी र विद्यालयलाई महानगरले सम्मान गरेको हो । ४ जीपीए ल्याउने विद्यार्थीहरुमा आदर्श माविका प्रिन्सकुमार गुप्ता, प्रियांश यादव, संयोग भट्टराई र श्रेय शर्मा आदर्श माविका प्रधानाध्यापक सन्तोष पोखरेललाई समेत सम्मान गरिएको थियो ।
कार्यक्रममा महानगरका मेयर नागेश कोइराला, उपमेयर शिल्पा निराला कार्की, प्रमुख प्रशासकीय अधिकृत रामप्रसाद ढुङ्गेल, सामाजिक विकास समितिका संयोजक काजीबहादुर बस्नेत, शिक्षा समितिका सदस्य रमानाथ भट्टराई, सावित्री पराजुलीलगायतले सम्मान गर्नुभएको थियो । ७ वटा विद्यालयका १६ जना विद्यार्थीले ४ जीपीए ल्याएका थिए । मोरङभरिमा ४ जीपीए ल्याउने विद्यार्थीको संख्या १८ जना रहेको छ ।
महानगरका २५ सार्वजनिक र ७२ वटा संस्थागत गरी ९७ वटा विद्यालयका ४ हजार ५२९ जना विद्यार्थीले एसईई दिएका थिए । जसमा ३ हजार ६९० जना अर्थात् ८१ दशमलव ४७ प्रतिशत विद्यार्थी ग्रेडिङ (उत्तीर्ण) भएका छन् । ८३९ जना भने ननग्रेडिङ भएका छन् । ९७ वटा विद्यालयले एसईई दिएकोमा शतप्रतिशत नतिजा ल्याउने विद्यालयको संख्या २८ रहेको छ । शून्य प्रतिशत नतिजा ल्याउने विद्यालयको संख्या २ रहेको महानगरका शैक्षिक प्रशासन महाशाखाका अधिकृत कृष्ण भट्टराईले जानकारी दिनुभयो । महानगर क्षेत्रभित्रका विद्यालयबाट एसईई दिएका १ हजार २२८ जनाले ३.६ भन्दा बढी जीपीए ल्याउन सफल भए ।
सम्मान तथा एसईईको मूल्याङ्कन कार्यक्रममा मेयर कोइरालासहित उपमेयर शिल्पा निराला कार्की, प्रमुख प्रशासकीय अधिकृत रामप्रसाद ढुङ्गेल, शैक्षिक महाशाखाका अधिकृत कृष्ण भट्टराई, सुशील दाहाल, प्याब्सन विराटनगरका अध्यक्ष अर्जुन श्रेष्ठ, आदर्श माविका प्रधानाध्यापक सन्तोष पोखरेल, सम्मानित विद्यार्थीहरुका तर्फबाट रागिनी न्यौपानेलगायतले मन्तव्य व्यक्त गरेका थिए । महानगरले विगत ३ वर्षदेखि एसईईमा ४ जीपीए ल्याउने विद्यार्थी र विद्यालयलाई सम्मान गर्दै आएको छ । महानगरभित्र सामुदायिक ५६, संस्थागत १२१ र धार्मिक विद्यालयको संख्या २१ रहेको छ । धार्मिक, सामुदायिक र संस्थागत कुल १९७ विद्यालयमा १ देखि १२ कक्षासम्म करिब ८० हजार विद्यार्थी अध्ययनरत छन् ।
